ပုသိမ်မှ ချောင်းသာသို့ သွားသော လိုက်ထရပ်ယာဉ်တစ်စီး အရှိန်မထိန်းနိုင်ဘဲ ချောက်ထဲထိုးကျ၊ ကျား/မ ၁၈ ဦး ဒဏ်ရာရရှိ

ဧပြီလ ၁၃ရက်နေ့ သင်္ကြန်အကြိုနေ့က ပုသိမ်မှ ချောင်းသာသို့သွားသော လိုက်ထရပ်စ်ယာဉ်တစ်စီး မွန်းလွဲ ၁ နာရီ ၁၀ မိနစ်ခန့်တွင်  ပုသိမ်မှချောင်းသာသို့အသွား ဘရိတ်ပေါက်ပြီး ၂၅မိုင်အကွာ ဆိပ်ကြီးကျေးရွာအနီး၊ ပေ ၅၀ ခန့်အနက်ရှိ ချောက်ထဲထိုးကျသွားရာ ခရီးသည် ကျား/မ ၁၈ဦး ဒဏ်ရာရရှိသွားကြောင်း၊ ချောင်းသာသို့ သွားရောက်အပန်းဖြေလိုသူများ စုပေါင်းငှားရမ်းလာသော ကားဖြစ်နိုင်ကြောင်း ဧရာဝတီတိုင်းဒေသကြီး ခရိုင်ရဲတပ်ဖွဲ့မှူးရုံး တာဝန်ရှိသူတစ်ဦးက ပြောသည်။
“ အုန်း”ကနဲအသံကြားလို့ အပြေးအလွှား သွားကြည့်ပါတယ်၊ ကားကတော့ ချောက်ထဲမှ၊ လူတွေကတော့ ထိုးကျလာတုန်းသစ်ပင်နဲ့တိုက်မိတဲ့ အရှိန်နဲ့ အကုန်လုံးတစ်ယောက်တစ်နေရာစီ လွင့်စင် ကုန်တယ်၊ ကားကအမိုးမပါတာတောသေးတယ်၊ အမိုးပါရင်တော့ ဒီထက်အခြေနေ ပိုဆိုးနိုင်တယ်” လို့ ဒေသခံတစ်ဦးဖြစ်သူ ကိုအသေးလေးမှ ပြောပြသည်။
“ချောင်းသာကလမ်းက တစ်ခြားကားလမ်းတွေထက်စာရင် နဲနဲကျဉ်းတယ်၊ တစ်ခြားအချိန်မှာ သိပ်မသိသာပေမဲ့ ဒီလိုသင်္ကြန်ချိန်ဆို ယာဉ်အသွားအလာကများတော့ လမ်းကြပ်တယ်၊ အကွေ့အကောက်နဲ့
တောင်တက်တောင်ဆင်းကလည်းများတော့ မောင်းတဲ့အချိန်မှာ သတိရှိဘို့လိုသလို၊ ယာဉ်ကလည်း ကြံ့ခိုင်ဘို့လိုတယ်”လို့ ချောင်းသာရဲစခန်းမှူး ရဲအုပ်မျိုးဆွေမှ ပြောပြသည်။
ယာဉ်တိမ်းမှောက်မှုကြောင့် ကားပေါ်တွင် ပါလာသည့် လူ၁၈ဦး အနက် ၁၁ဦးမှာ အပြင်းအထန် ဒဏ်ရာရရှိပြီး ပုသိမ်ဆေးရုံကြီးတွင် အတွင်းလူနာအဖြစ် ဆေးဝါးကုသမှုခံယူလျက်ရှိသည်။ ထိုလူနာများအနက် ၃ ဦးအား ရန်ကုန်ပြည်သူ့ဆေးရုံကြီးသို့ လွှဲပြောင်းတင်ပို့ရန် စီစဉ်လျှက်ရှိကြောင်းလည်း သိရသည်။
အဆိုပါယာဉ်တိမ်းမှောက်မှုနှင့် ပါတ်သက်၍ ယာဉ်မဆင်မချင်မောင်းနှင်သူ ယာဉ်မောင်း ဦးအောင်ကျော်နိုင်အား ချောင်းသာရဲစခန်းမှ (ပ)ယာဉ် ၅/၂၀၁၃၊ ပြစ်မှုပုဒ်မ ၃၃၇-၃၃၈ ဖြင့် အမှုဖွင့်ကာ အရေးယူထားကြောင်း
သိရသည်။