KNU ခေါင်းဆောင်များမှ လူငယ်များအား ငြိမ်းချမ်းရေးလုပ်ငန်းစဉ်အကြောင်း ရှင်းရှင်းလင်းသိရှိနိုင်စေရန် ရန်ကုန်မြို့မှာ ရှင်းလင်းတင်ပြခဲ့
KNU က ခေါင်းဆောင်တချို့နဲ့ လူငယ်အရပ်ဘက် အဖွဲ့ အစည်းတွေ တွေ့ဆုံပြီး ငြိမ်းချမ်းရေးဖြစ်စဉ်များ နှီးနှောဖလှယ် ပွဲကို သြဂုတ်လ ၁၃ ရက်နေ့က ရန်ကုန်မြို့ ယုဒဿန်ခန်းမမှာ ကျင်းပစဉ် Photo: Sann Maw Aung / RFA
လက်ရှိ အစိုးရနဲ့ တိုင်းရင်းသားလက်နက်ကိုင်အဖွဲ့တွေ ကြိုးပမ်းနေတဲ့ ပြည်တွင်း ငြိမ်းချမ်းရေး လုပ်ငန်း စဉ်တွေကို လူငယ်တွေသိရှိအောင် ရည်ရွယ်ချက်နဲ့ KNU ကရင်အမျိုးသားအစည်းအရုံး ခေါင်းဆောင်တွေ ဟာ အရပ်ဖက်အဖွဲ့အစည်းက ကိုယ်စားလှယ်တွေနဲ့ ဒီနေ့ တွေ့ဆုံဆွေးနွေးခဲ့ ပါတယ်။
ဒီနေ့ဆွေးနွေးပွဲကို တက်ရောက်ခဲ့တဲ့ မြန်မာလူငယ်များ ဖွံ့ဖြိုးရေးအဖွဲ့က ကိုဝေဖြိုးအောင်က ဆွေးနွေးပွဲ အကြောင်း အခုလိုပြောပါတယ်။
"ကရင်ပြည်နယ် ပြည်သူလူထုအနေနဲ့ကတော့ ကရင်ပြည်နယ်ခေါင်းဆောင်တွေနဲ့ ဒီလို တိုင်းရင်းသားခေါင်းဆောင်တွေနဲ့ ဒီလို မျိုးပေါ့ တွေ့ တာကတော့ အရမ်းကောင်းပါတယ်၊ ဘာလို့လဲဆိုတော့ တခါတလေကျလို့ရှိရင် တိုင်းရင်းသားခေါင်းဆောင်တွေက အပေါ်ပိုင်းမှာ အလုပ်လုပ်တာများတယ်၊ အလုပ်လုပ်ရတာ များတယ်ဆိုတော့ ဟိုအောက်ခြေအထိ ပြည်သူတွေရဲ့အသံ၊ ဒီ ကရင်လူမျိုးလူထုတွေရဲ့အသံ၊ အထူးသဖြင့် ဒီ လူငယ်တွေရဲ့အသံကို သိပ်ပြီးတော့ မသိတာများတယ်၊ အဲ့ဒီတော့ ကျနော်တို့လိုမျိုး လူငယ်အဖွဲ့ အစည်းတွေကို သူတို့က အခုလိုမျိုး တွေ့ဆုံပေးလို့ရှိရင် ကျနော်တို့တွေ ရင်ထဲကခံစားချက်တွေ သူတို့ကပိုပြီးသိလာမယ်၊ ကျနော်တို့တွေ အခက်အခဲကို ပိုပြီးနားလည်လာမယ်၊ ကျနော်တို့တွေနဲ့ သူတို့ ပြောလို့ရှိရင် ကရင်ပြည်သူတွေ တကယ်ရင်ဆိုင်နေရတဲ့ အခက်အခဲ ဆန္ဒတွေကိုသူတို့ ပိုသိလာလိမ့်မယ်၊ အဲ့ဒါကြောင့်မို့လို့ ကျနော်ကတော့ ဒီလိုမျိုးပွဲတွေ ခဏခဏ လုပ်ပေးစေချင်တယ်"
ဒီနေ့ အခမ်းအနားမှာ ကရင်အမျိုးသားအစည်းအရုံး ကေအန်ယူက ဗဟိုကော်မတီဝင် ပဒိုစောသမိန်ထူးနဲ့ စည်းရုံးရေးမှူး ပဒိုစောလှထွန်းတို့က အစိုးရနဲ့ ကေအန်ယူအကြား အကောင်အထည်ဖော်နေတဲ့ ငြိမ်းချမ်းရေးလုပ်ငန်းစဉ်တွေကို ရှင်းပြခဲ့တာဖြစ်ပါတယ်။
အခမ်းအနားတက်ရောက်ခဲ့ကြတဲ့ ကိုယ်စားလှယ်တွေက ကရင်ပြည်နယ် ဖွံ့ဖြိုးတိုးတက်ရေး ၊ ပညာရေးနဲ့ အလုပ်အကိုင်အခွင့်အလမ်းတွေ ဖန်တီးပေးရေးကိစ္စတွေကို ဆွေးနွေးခဲ့ကြတယ်လို့ သိရပါတယ်။
ဒီနေ့ အခမ်းအနားကို ရန်ကုန်မြို့အခြေစိုက် လူငယ်အရပ်ဘက်အဖွဲ့အစည်း ၅၀ ကျော်က ကိုယ်စားလှယ် ၁၀၀ ကျော် တက်ရောက်ခဲ့ပါတယ်။
RFA
